​احمد علي لودین د عبدالواحد خان زوی په ۱۸۸۶ز کال کې زېـږېـدلی دئ. د ۱۹۱۷ز کال په جنورۍ کې په بمبـﺌـي کې افغان استازی. د ۱۹۱۹ز کال په مارچ کې په کابل کې وو. د ۱۹۱۹ز کال د نوامبر په میاشت کې په پـېـښور کې افغان قـنـسـل خو اجازه ورنـﮥ کړل سوه چې برتانوي قلمرو ته ننوځي. د ۱۹۲۰ز کال په سپتمبر کې په ډکه کې د سرحد دار په توگه وگومارل سو.

په ۱۹۲۱ز کال کې پولیټیکل آفیسر؛ د ۱۹۲۱ز کال د نوامبر په میاشت کې له دې کاره رخصت او کابل ته راستون سو. د ۱۹۲۱ز کال د دسمبر په میاشت کې د کوهستان مشر حاکم (حاکم ِ کلان). د ۱۹۲۵ز کال په سپتمبر کې په برلین کې مختار وزیر. په ۱۹۲۸ز کال کې بـېـرته کابل ته راستون سو. د ۱۹۲۸ز کال د نوامبر په میاشت کې کابل ښاروال. د ۱۹۲۹ز کال د مې په میاشت کې له امیر امان الله خان سره هندوستان ته ووت او ورپسې له سردار عنایت الله خان سره فارس ته لاړ. د ۱۹۲۹ز کال د دسمبر په میاشت کې کابل ته راستون سو.

د ۱۹۳۰ز کال د جنورۍ په میاشت کې د دربار د وزیر په توگه ﺌـې دنده پیل کړه. د ۱۹۳۰ز کال د اپریل په میاشت کې د جنگ د وزارت مرستیال وزیر. د ۱۹۳۰ز د جولای په میاشت کې د قطغن او بدخشان د ملکي او پوځي چارو لوی اداري مشر یا تنظیمیه رﺌـیس.  وروسته ددﮤ ځای ناستی جنرال غلام غوث خان سو او دی مزار شریف ته د مزار د مرستیال والي په توگه واستول سو. په ۱۹۳۱ز کال کې د شمال د ولایتونو تنظیمیه رﺌـیس.  د ۱۹۳۲ز کال په جنورۍ کې کابل ته راستون سو او د «رﺌـیسِ اردو» او د ملي دفاع د وزیر په توگه وگومارل سو (له محـمد داؤود سره په اداري موضوعاتو کې موافق نـﮥ وو). د شاه جان غني احمدزي خسر. په ۱۹۳۸ز کال کې وفات سو.

لیکوال: لودویگ آدمک
ژباړونکي: رحمت آریا