دا کتاب یو کونړي لیکوال او ژورنالست، ولي الله ملکزی لیکلي او د کونړ د څپانده سیندونو، دنګو غرونو سپینو واورو، خټینو منارو، هسکو نښترو او شنو درو د ښکلا ګانو څخه د پلو پورته کولو یوه تته غوندې هڅه یې کړیده. په دې کتاب کې، د کونړ د غرنۍ او اقلیمي جغرافیا، د ځنګلونو د بې رحمه غوڅولو د مخنیوي او سیلانیانو د راجلبولو لپاره وړاندیزونه شويدي. همدا رنګه په کونړ کې د استوګنو ۱۹ قومونو لنډه تاریخچه او په کونړ کې د پنج پیري او سلفي غورځنګونو په جوړښت باندې خبرې شوې ترڅو د ولس په متن کې د هغو اغیز او غبرګون څرګند شي.
له لسګونو مخورو او مطرحو شخصیتونو سره د مخامخ او ټلیفوني مرکو په ترڅ کې د ۱۰۸ شمله ورو او تعلیم یافته کونړو سوانح او د نژدې ۲۶۵ نورو مخورو کونړیانو نومونه او ځایونه په نښه شویدي. دلته د کونړ د شپاړسو اداري واحدونو پيژندګلوي، د هرې ولسوالۍ نفوس، د ښوونځیو شمیر، د مشهورو درو، غټو کلیو او بانډو نومونه راغلي دي. کونړي دودونه، سپورتي لوبې، سندریز هنرونه او د واده او جنازې مراسم او رواجونه په ګوته شوي دي.
د کونړ په هکله دا کتاب نه لومړنې دی او نه به وروستنې وي. د کونړ یو شمیر پخو لیکوالانو او پوهانو ډیرې هر اړخیزې او پراخه څیړنې کړې او د شاباس او قدردانۍ وړ دي. خو ما دلته په هغه څه باندې زیات لنګر اچولې چې په نورو اړونده کتابونو کې لږ په سترګو کیږي او یا دا مهال یې اړتیا زیاته محسوسیږي. په دې کتاب کې هڅه شوی چې د چارواکو او مرستندویه مؤسسو پام دیخوا ته را واوړي ترڅو د کونړیانو ستونزې د خپلو پرمختیایي پلانونو په بهیر کې ځای کړي. دلته زیار ویستل شوی چې د کونړ په هکله د ځوان کول د پوهاوي کچه لوړه شي او د ژوند په سمون او رغون کې هغه څه وکړي چې دوئ یې مستحق او حقدار دي.